الرئيسية » مرثيات الحوت » الشعر والرثاء » محمود رحل مرثية الاعلامي الطيب عبد الماجد

مرثية الاستاذ الطيب عبد الماجد في فقيد الشعب السوداني محمود عبد العزيز اهداء لي كل اخواني الحواته ..

‎Posted by Ahmed Mohmmed Abdalrhman on‎ 26 يناير، 2016

محمود رحل مرثية الاعلامي الطيب عبد الماجد

مرثية الاستاذ الطيب عبد الماجد في فقيد الشعب السوداني محمود عبد العزيز  ( الحوت ) اهداء لكل الحواته

ولكل شبر في جمهورية الفنان محمود عبد العزيز الجان وعبر الموقع الرسمي للفنان محمود عبد العزيز

محمود رحل ….

ماقال بجي والحفله يوم العيد عصر
مكتوب كمان يوم الخميس ..
صاح يا عزيز..
يوم الخميس اسرع تعال ليلة عُمر

فى الجامعة ديك اتلملموا حفله وعِرس
بالليل كمان اللمه فى نادى التنس
كل الخلوق حارساك هناك
قبل ما تغيب الشمس
شان يلقوا حته يقيفوا فيها
ويحضروا الحوت …يا شمس
الود بغسل فى العجل
واخوه جوه على الوِرش
فرحان بلملم فى القريشات
شان يخش
يحضر غناك ..
ويقول وراك
عاوز تخليه وتمِش !!
عايز يكون هو الصمود
مايبقي غِش

انشالله خير
الساعة تسعة وحبتين
انت وينك ياحنين.!!؟..
مكتوب علي سفر الشجون
لوعة حزين
والنادى مليان بالخلق
و الناس بى بره مَدفقين
قالو التذاكر انتهت
ولسه برضو مأملين
إنو المسائل تنفرج
ويخشو للجان الحنين
تتألق الصالة وتضج
تتعذب اهات السنين
…..
بطل هزار ياحوت تعال …
عارفك بتتأخر دقايق
شان تزيد الشوق علينا
وبالنا بعدك يبقي رايق
تبدى بي فى الغربه مشتاق لعينيك
ولينا سايق …
ويظهر (الود الشفت) شايل جراح
و حلوه بتمر الدقايق
الكنت قايلو فات زمان
رجعتو بى طعم الغنا
الله عليك ياجان غريب
شايل جراحات همنا
دنيانا بيك تصبح جميله
نغنى لى خاتم المنى

ياحوت خلاص يلاك تعال
راجين غناك
الكل حضور
والفرقه تعزف فى رجاك
……
كان شفت ياحوت بى وراك.!!…
ناس “نطو ” بالسور الهناك…
شان التذاكر انتهت
حتى الشبابيك قفلت
الا بس…. شباك هواك
معاه باب الريد فرح
فاتح علي شارع غناك
شفت كيف ياجان تعبنا الليله
نحلم بي لقاك
ما نحن نملاها المسارح
من أمامك وبى وراك
ونغنى لى خوف الوجع…
تبرا انت من الوجع
ما يكون معاك..

مالك حزين ياحوته بس
واقف براك …
وإتاخرت انت الليلة
كل الناس بتستناك

ونحن خلاص قلقنا عليك
وين ياحوت !!؟
صحى الالام جاتك تانى
يا محمود!!؟

سلامتك انت يالمسكون بريد الكل
والمعطون بحب الناس
نحن هناك منتظرين بداية الحفلة فى النادى ..
وكل الناس …
وقالو الليله حتغنى بمزاج عالى
وتملا الدنيا بالإحساس
لأنو صراحة ياحوته.. وياغالي
يافنان ويا انسان.. وياحساس
صوتك في مساماتنا وبدفينا
وغناك بدخل مع الأنفاس
غريبه الليله إتاخرت إنت خلاص
خير ياناس !!؟؟

ياخوانا ورونا الحصل….
الحوت وصل !!؟؟
الليله مايوم الخميس
صاح يا عزيز ..!
إخترت إنت طريق طويل
بعد الفراق إيه الحصل ..

معقوله بس تمشى وتفوت
من غير كلام كده يا أمير
ولا حتى بس كلمة وداع
وأنا منتظر تحت الهجير
ولاضحكه منك بس تطمن
عازه تسأل والخليل !!؟
راجين إشارة من الجميل
تضحك تقول …
الحوت رجع ..خفّ الوجَع ..
واتشد وتر المستحيل

إيه الحصل !!؟…
جانا الخبر
إنو انت على سفر
قبل مانضرب نصل
قالو إنو الحوت وصل
…إلا مابقدر يغنى.. ولا بيصل!!؟
فى النشره اعلانك نزل ..
. مكتوب كمان يوم الخميس..
محمود رحل ….

الحوت | حواته يا محمود ما لينا اي حدود

 

 

عن al7oot

خريج كلية علوم التقانة قسم علوم حاسوب ومتخصص في تصميم المواقع وادارتها .. من عشاق الراحل الفنان الانسان " محمود عبد العزيز " وكما يحلو لعشاقه ان يسمونه " الحوت " ونسال الله له الرحمة وان يجعله من اصحاب اليمين ولاهله حسن العزاء ولنا الصبر الجميل.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*